بيني وبين نفسي

2007-04-05T23:16:00.002+04:00

كلام يدور بيني وبين نفسي من فتره من الزمن قد يشكل جمل مفيده تثري العالم البلوقي الى بدأ يشرق بأضواء كتاب رائعين ويقدمون

للقراء وجبات ما تلقهاها في اي مطعم هندي

كتاب البلوقات ينقسمون الى عده اقسام

الكتاب الى ما عندهم لا شغله ولا مشغله غير كتابه كل شي يصير بحياتهم بكل التفاصيل الممله .. رحت شريت جوتي ... ريلي قالي حبيبتي مرتين امس .. سافرنا وركبنا قطار يطير .. امش شفت صوره ريلي واهو صغير ومن هالكلام الى ما ييمع الا عشاق المسلسلات المكسيكيه

واغلب كتاب هذا النوع من الدراما يكون من النساء الى عافتهم الدنيا وبقى صديقهم الصدوق الكمبيوتر لأنه ما يرفض طلب

النوع الأخر الى يطل ويغط وهذا النوع من الجنسين يكون يكتب اذا عنده شي يقول واغلب الاحيان يكون غامض لان كلامه محد يفهمه غيره اهوه لانه يفكر ويكتب ويصير تصادم بين الأفكار فتلقون البدليات وايد لأنه ما يراجع الشغله الى كتبها لانه اذا راجع راح يمسح نص الكلام

والنوع المتزمت بالدين والى اسمهم الداعيين الى الدين كله عندهم مناورات عن الأسلام وعادتا ما يكونون سياسيين محنكين واغلبه كوبي بيست من الجرايد .. ويعلقون على الجريده ويطبون بالوزارات وبكل شي هذا النوع اغلبه من الرجال ولكن للنساء مقاعد ايضا للمبرقعات

وفي النوع الحبيب الى كله شعر وغزل وخواطر .. لماذا رحت عني يا حبيبي وهالسوالف 982374193847

بوست عن الحب والوانه ومصادره واذا طلع الحب من القلب يوصل وين ومع الدوره الدمويه وين يوصل ومحطه الأخير وين

هالكتاب فيهم ميزه حلوه ان ما عليهم من الدنيا ما يدشون الا البلوقات الى كلها عصافير تشدو علشان يقولون صح لسانك ويطلعون واهم مو قارين شي

والنوع الى بس تدش تحس انك داش عزاء للسيدات الكل فيه يطب بالرياييل هناك يتيمعون المطعونين بقلبهم من والي يعانون الفراق

وتلقى الشباب هناك يصيرون مثال للقلب المحب الطاهر الوفي ويصارعون افكار النساء من اجل البقاء

وبلوق الحب البلوقي المتوحش البنت تكتب حق الصاحب البلوقي احبك يا نظر عيني واهو يرد عليها ببوسته القادم

Re- احبك يا نظر عيني

ويكون الهدف من هذا البلوق تقريب افكار الحبيبين .. خو دق عليها وخلصنا ليش تطول السالفه

وفي النوع القزراني الى مسوي مشكل عنيف كل شي في قوله موضوع واهو يطربك ويتحسس الموضوع الى ماشي ويشتغل علية

هالنوع من الكتاب لهم هدف كسب صداقات او علاقات تبون سوالف بالدين يصير عالم دين .. تبون الحب عنده بالدرج وايد تبون رقص اول واحد يتحزم تبون فلافل يعلمكم شلون تسسون .. وهذا اهو النوع القزراني

والنوع الى عايفته الدنيا لسبب من الاسباب يحاول يفتح نافذه علشان يطلع شويه هم ويبجي القراء وعادتا يكون بنظر القراء الكتكوت المسكين الى غدرت به الدنيا .. يعني اول ما تدش البلوق تقول لا حول ولا قوه الا بالله

وفي وفي وفي وفي

بس النوع الساطي على البلوقات اهم الكتاب السياسين الى لهم مقعد مخضرم وعود ولهم صيت حتى الجرايد تبوق كلامهم مرات

البوست لما تقراه تحس بانك مظلوم علطول من غير اي تفكير وان الكل يبوقنا واحنا ما ندري وين الله قاطنا و باقي يومين وتصير مصيبه

اذا ما طلعنا الشوارع وقمنا نصرخ كافي كافي يمكن كلامهم في شي من الصحه ولكن مضخم ويسد النفس

لو بتكلم عن الناس ما راح اخلص بس هذا الى موجود الحين تبون اكلو ما تبون اقرب مطعم يوصل طلبو منه

كنت حاط امثله لكل نوع ولكن نظرا للأسلوب الأذع قررت اشيله ودورو عاد على الانواع والى يلقاهم كلهم يربح معانا وجبه من مطعم هندي .. وبالعافيه مقدما

HosNo

بيني وبين نفسي